Ispaniyada temir yo‘l halokati: uch kunlik motam e’lon qilindi
Ispaniya hukumati Andalusiya avtonom hududida sodir bo‘lgan og‘ir temir yo‘l halokatidan so‘ng mamlakat bo‘ylab uch kunlik motam e’lon qildi. Bu haqda Zamin.uz xabar berdi.
Ushbu qaror haqida qirollik hukumati raisi, Bosh vazir Pedro Sanches ma’lum qildi. Bosh vazirning so‘zlariga ko‘ra, motam 20-yanvar kuni yarim tunda boshlanib, 23-yanvar kuni yarim tungacha davom etadi.
U halokat sabablarini o‘rganishda to‘liq shaffoflik va ochiqlik ta’minlanishini va’da qildi. Ma’lumotlarga ko‘ra, 18-yanvar kuni Ispaniyada ikkita tezyurar poyezd relsdan chiqib ketgan.
Ushbu fojia natijasida 40 kishi halok bo‘lgan, 150 dan ortiq odam jarohatlangan. Halokat Kordoba viloyatining Adamus shahri yaqinida, Madriddan taxminan 360 kilometr janubda sodir bo‘lgan.
Madriddan Uelvaga yo‘l olgan poyezdning 27 yoshli mashinisti ham vafot etgani tasdiqlandi. Ikki poyezdda jami 317 yo‘lovchi bo‘lgan.
Ularning aksariyati dam olish kunlaridan so‘ng Madridga yoki Madriddan qaytayotgan ispan fuqarolari ekani aytilmoqda. Yanvar oyi sayyohlik mavsumi bo‘lmagani sababli, yo‘lovchilar orasida qancha sayyoh borligi hozircha aniqlanmagan.
