Ijtimoiy tarmoqlar o‘smirlar ruhiyatiga zarar yetkazmaydi
Buyuk Britaniyaning Manchester universiteti olimlari tomonidan olib borilgan tadqiqotlar natijasida ijtimoiy tarmoqlar va videoo‘yinlarning o‘smirlar ruhiyatiga ta’siri bo‘yicha ilgari mavjud bo‘lgan qarashlar qayta ko‘rib chiqildi. Bu haqda Zamin.uz xabar berdi.
Tadqiqotda 25 mingdan ortiq maktab o‘quvchilari ishtirok etdi. Ushbu ilmiy izlanish natijalariga ko‘ra, ijtimoiy tarmoqlardan foydalanish yoki videoo‘yinlarga ko‘p vaqt ajratish o‘smirlarning ruhiy salomatligiga salbiy ta’sir ko‘rsatmaydi.
Tadqiqot uch yil davomida 12 yoshdan 15 yoshgacha bo‘lgan bolalar o‘rtasida olib borildi. Bu jarayonda longityud usuli qo‘llanilib, har bir o‘smirning shaxsiy rivojlanishi va ruhiy holati o‘rganildi.
Natijalar shuni ko‘rsatdiki, ijtimoiy tarmoqlarda ko‘p vaqt o‘tkazish va ruhiy salomatlik o‘rtasida to‘g‘ridan to‘g‘ri bog‘liqlik yo‘q. Shuningdek, tarmoqdan faol yoki passiv foydalanishning ruhiy holatga ta’siri o‘rtasida farq topilmadi.
Jinsiy farqlar ham kuzatildi. Qiz bolalar orasida ijtimoiy tarmoqlar va videoo‘yinlar bir-biriga raqobatchi sifatida namoyon bo‘lsa, o‘g‘il bolalarda videoo‘yinlarga qiziqish ruhiy holatga bog‘liq ravishda o‘zgarishi aniqlandi.
Olimlar ekran vaqtini cheklash yoki smartfonlarni taqiqlash kabi choralarning uzoq muddatli ruhiy salomatlikka ijobiy ta’sir ko‘rsatishini tasdiqlovchi dalillarni topa olishmadi. Shu sababli, farzandlarning texnologiyadan foydalanishini cheklashdan ko‘ra, ular bilan jonli muloqotni kuchaytirish va hissiy qo‘llab-quvvatlash ko‘proq foyda keltirishi mumkin.
Bu borada ota-onalarning o‘zaro suhbat va hamkorlikka asoslangan yondashuvi muhim ahamiyat kasb etadi.
