Rossiyada olim DW videosi uchun 7 yilga hukm qilindi
Leningrad viloyati, Gatchina shahri sudi Sankt-Peterburg yadroviy fizika institutining sobiq xodimi Dmitriy Bogmutga nisbatan qat’iy hukm chiqardi. Bu haqda Zamin.uz xabar berdi.
51 yoshli olim Rossiya armiyasi haqidagi yolg‘on ma’lumotlarni tarqatishda ayblanib, yetti yil muddatga umumiy tartibdagi koloniyaga hukm qilindi. Ushbu qaror viloyat prokuraturasi tomonidan tasdiqlandi.
Tergov materiallariga ko‘ra, Bogmutning jinoiy javobgarlikka tortilishiga uning ijtimoiy tarmoqlardagi tinchlikni targ‘ib qiluvchi chiqishlari sabab bo‘lgan. Olim o‘z sahifasida Deutsche Welle (DW) nashrining Rossiya armiyasi va Ukrainadagi harbiy harakatlarga bag‘ishlangan videomaterialini tarqatgan.
Sudda so‘zlagan so‘nggi nutqida Bogmut yoshlik yillari “qayta qurish” davriga to‘g‘ri kelganini eslab, “Tinchlik — dunyoga!” shiorlari ostida ulg‘ayganini ta’kidladi. U urushni maqtashni na tushunishi, na qabul qilishi mumkinligini aytib, har qanday urush faqat qon va o‘lim olib kelishini qo‘shimcha qildi.
Dmitriy Bogmut ilmiy faoliyatini texnik sifatida olib borgan va 2024 yil aprel oyidan buyon hibsda saqlanib kelayotgan edi. U DW videosini 2023 yilda tarqatgan.
O‘sha vaqtda mazkur mediakompaniya Rossiyada “nomaqbul tashkilot” deb e’lon qilinmagan edi. Keyinchalik, 2025 yil dekabr oyida Deutsche Welle Rossiya rasmiylari tomonidan “nomaqbul tashkilotlar” ro‘yxatiga kiritildi.
Ushbu maqom mediakompaniya bilan hamkorlik qilishni, jumladan, ularning materiallarini tarqatishni jinoiy javobgarlikka sabab deb belgilaydi. Germaniya hukumati va DW rahbariyati ushbu qarorni so‘z erkinligiga qarshi tahdid sifatida keskin qoraladi.
Rossiya qonunchiligiga ko‘ra, ushbu axborot vositalarini shunchaki o‘qish jinoyat hisoblanmasa-da, ularning materiallarini ijtimoiy tarmoqlarda bo‘lishish og‘ir jinoyat sifatida baholanmoqda. Shu sababli, ijtimoiy tarmoqlardagi fikr yoki repost uchun og‘ir jazo berilishi jamiyatdagi erkin fikr almashinuvi va xilma-xillikka jiddiy ta’sir ko‘rsatishi mumkin.
