Tramp: Eron bilan yangi bitim zarur!
AQSh prezidenti Donald Tramp 31-yanvar kuni Eron bilan yangi va qoniqarli bitim tuzish zarurligini ta’kidladi. Bu haqda Zamin.uz xabar berdi.
Uning so‘zlariga ko‘ra, bunday kelishuvning asosiy sharti – Eronning yadroviy qurollarga ega bo‘lmasligini ta’minlashdir. Tramp bu fikrlarini Floridaga uchayotgan paytida, Air Force One samolyoti bortida jurnalistlar savollariga javob berar ekan, bayon qilgan.
Oq uy rahbari Eron bilan muloqotlar davom etayotganini tasdiqladi va ularni “jiddiy muzokaralar” deb atadi. Shu bilan birga, AQShning bu boradagi aniq rejasi haqida ochiq ma’lumot bermadi.
Trampning ta’kidlashicha, qaror muzokaralar natijasiga qarab qabul qilinadi. U “bitim bo‘lsa — yaxshi, bo‘lmasa — keyin ko‘ramiz” degan yondashuvni bildirgan.
Tramp xavfsizlik masalalarida Yaqin Sharqdagi ittifoqchilarini ehtimoliy harakatlar rejasi bilan oldindan to‘liq xabardor qilmasligini ham ma’lum qildi. Uning fikricha, rejani oshkor qilish uning samaradorligini yo‘q qilishga olib kelishi mumkin.
Shu bilan birga, AQShning mintaqaga qo‘shimcha harbiy kuchlar joylashtirgani haqida xabarlar tarqaldi. Jumladan, Eron sohillari yaqiniga “Avraam Linkoln” aviatashuvchi kemasi boshchiligidagi zarbdor guruh yuborilgani aytilmoqda.
Bu esa mintaqada ehtimoliy to‘qnashuvlar xavotirini kuchaytirdi. Eron esa AQSh va uning ittifoqchilari obyektlariga, jumladan Isroilga tegishli bazalar va kemalarga javob zarbasi berilishi mumkinligi haqida ogohlantirdi.
Tramp esa Eron urushdan ko‘ra yadroviy va raketa dasturlari bo‘yicha kelishuvga kelishga ko‘proq tayyor ekaniga ishonishini bildirdi.
