Xarbinda pingvinlar paradi qishki kayfiyat ulashdi
Xitoyning Xarbin shahrida qish mavsumining eng qiziqarli va esda qolarli tadbirlaridan biri bo‘lib o‘tdi. Bu haqda Zamin.uz xabar berdi.
Harbin Polarland tematik parkida pingvinlar paradi tashkil etildi. Ushbu tadbir park an’anasiga aylangan bo‘lib, har yili mehmonlarga qishki ertak kayfiyatini ulashadi.
Parad davomida pingvinlar maxsus kostyumlar va bo‘yinbog‘larda namoyish qilindi. Ularni park xodimlari kuzatib, tartib bilan tomoshabinlar oldidan olib o‘tishdi.
Pingvinlarning o‘ziga xos yurishlari va qiyofalari tomoshabinlarni beixtiyor tabassumga chorladi. Ba’zan ular jiddiy “qutb zodagonlari”ga o‘xshasa, ba’zan oddiygina pingvinligicha qoladi.
Harbin Polarland qutb hayvonlari va arktik manzaralarga bag‘ishlangan ilk tematik parklardan biri hisoblanadi. Shu sabab bu yerdagi barcha shou va tadbirlar aynan “so‘nggi muzliklar ruhi”ga moslashtirilgan.
Xarbin shahrida qishki tadbirlar faqat pingvinlar paradigina emas, balki muz va qor festivali bilan ham mashhur. Har yili ushbu festivalda qor va muzdan ulkan inshootlar quriladi.
Kechqurun esa yoritilgan kompozitsiyalar shaharni go‘yoki ertaklar dunyosiga aylantiradi. O‘tgan yilda balandligi qariyb 8 qavatli binoga teng qorbobo haykali festivalning eng ko‘p muhokama qilingan asari bo‘ldi.
Xarbin shahri qishni faqat sovuq mavsum sifatida qabul qilmay, uni katta shouga aylantirishga muvaffaq bo‘lgan. Pingvinlar paradi kayfiyat ulashgan bo‘lsa, muz shaharchasi mehmonlarni hayratga solishda davom etadi.
Bu kabi tadbirlar qishki faslni odamlar uchun yoqimli va unutilmas xotiraga aylantiradi.
