AQSh harbiylari Ormuz bo‘g‘ozi yaqinida Eron katerlarini yo‘q qildi
Amerika Qo‘shma Shtatlari harbiylari Ormuz bo‘g‘ozi yaqinida Eronning o‘n olti ta minalovchi katerini yo‘q qildi. Bu haqda Zamin.uz xabar berdi.
Bu haqda 10 mart kuni AQSh Qurolli Kuchlari Markaziy Qo‘mondoni ma’lum qildi. Zarba Eronning mintaqadan neft tashuvchi kemalar o‘tadigan Ormuz bo‘g‘ozini minalashtirish niyatida ekani haqida tarqalgan xabarlardan so‘ng berildi.
AQSh prezidenti Donald Tramp ham o‘zining ijtimoiy tarmog‘ida Eron kemalarining yo‘q qilinganini tasdiqladi. Markaziy Qo‘mondonlik tomonidan zarba berilgan katerlar tasvirlangan video ham e’lon qilindi.
Ormuz bo‘g‘ozi Yaqin Sharqdan neft tashish uchun eng muhim yo‘laklardan biri bo‘lib, Isroil va AQShning Eronga qarshi urushi boshlanganidan beri unda fuqarolik kemalari deyarli harakat qilmayapti. 10 mart tongida Islom Inqilobi Posbonlari Korpusi AQSh va Isroil hujumlari davom etar ekan, mintaqadan neft eksport qilinishiga yo‘l qo‘ymasligini ma’lum qildi.
Shundan so‘ng, AQSh razvedkasiga tayangan holda, Eron Ormuz bo‘g‘ozini minalashtirishga tayyorgarlik ko‘rayotgani haqida xabarlar tarqaldi. Donald Tramp Tehronni bu harakati uchun og‘ir oqibatlar kutayotgani haqida ogohlantirdi.
Eslatib o‘tish joizki, Isroil va AQSh 28 fevral kuni Eronga qarshi yirik harbiy hujumlarni boshlagan edi. Harbiy harakatlarning ilk kunida Eron oliy ruxoniysi oyatulloh Ali Xomenei va bir qator yuqori martabali amaldorlar halok bo‘ldi.
Uning o‘rnini 56 yoshli o‘g‘li Mojtaba Xomenei egalladi. Bunga javoban Eron ham Isroil hududi va AQShning Yaqin Sharqdagi harbiy bazalariga zarbalar bermoqda.
