Qirgizistonlik qori jahon tanlovining g‘olibiga aylandi

Qirgizistonlik Muhammadali qori Umarov jahon miqyosida o‘tkazilgan tanlovda g‘oliblikni qo‘lga kiritdi. Bu haqda Zamin.uz xabar berdi.

Bu musobaqa Saudiya Arabistonining Jidda shahrida bo‘lib o‘tdi va xalqaro ahamiyatga ega edi. Tanlovda ishtirok etish uchun dunyoning turli burchaklaridan o‘n mingdan ortiq so‘rov kirdi.

Ulardan ikki ming nafar dastlabki bosqichdan o‘tib, asosiy musobaqa maydoniga chiqdi. Yakuniy bosqichda esa faqat 64 nafar yetakchi qori o‘z bilimini namoyish etdi.

Ushbu tanlov sakkiz kun davomida o‘tkazildi va har bir ishtirokchidan Qur’oni karimni to‘liq yodlab, tajvid qoidalariga qat’iy amal qilish talab qilindi. Musobaqa natijalariga ko‘ra, birinchi o‘rinni Qirgiziston vakili Muhammadali qori Umarov egalladi.

Undan keyin AQSH, Misr, Suriya va Shvetsiya vakillari mos ravishda ikkinchi, uchinchi, to‘rtinchi va beshinchi o‘rinlarni band etdilar. G‘olibga 50 ming Saudiya riyoli miqdorida pul mukofoti topshirildi.

Muhammadali qori o‘z muvaffaqiyatini Vatani xalqining duolari va qo‘llab-quvvatlashi bilan bog‘lab, bu g‘alaba butun millatning yutuqlari ekanini ta’kidladi. U Yaratganga shukrona aytib, jahon maydonida birinchi o‘ringa chiqish imkoniyatini berгани uchun minnatdorligini bildirdi.

Qayd etish joizki, Muhammadali qori Umarov hozirda Madina Islom universitetining Qur’on fakultetida to‘rtinchi kurs talabasi bo‘lib o‘qiyapti. Bu uning birinchi jahon g‘alabasi emas.

U avvalroq 2022 yil sentyabr oyida Makka shahrida o‘tkazilgan boshqa tanlovda ham 111 ta davlat vakillari ishtirokida birinchi o‘rinni egallagan edi. O‘sha paytda unga 250 ming riyol miqdorida mukofot berilgandi.

Qirgizistonlik qorining bu yutuqlari islom olamida o‘zining oliy maqomini yana bir bor tasdiqladi va yoshlar uchun katta namuna bo‘ldi.