Xitoy Amerika obligatsiyalarini sotib oltin zaxiralarini keskin ko'paytirmoqda
Jahon moliya bozorida dollar hukmronligiga jiddiy ta'sir ko‘rsatishi mumkin bo‘lgan yirik geosiyosiy o‘zgarishlar kuzatilmoqda. Bu haqda One.uz xabar beradi.
Dunyoning ikkinchi raqamli iqtisodiyoti hisoblangan Xitoy AQSHning g‘aznachilik obligatsiyalaridagi ulushini izchil ravishda sotib, ushbu ko‘rsatkichni 2001-yilgi tarixiy darajagacha tushirib yubordi. Bir vaqtning o‘zida Pekin xalqaro bozorlarda oltin narxining keskin qimmatlashishiga qaramay, qimmatbaho metall zaxiralarini misli ko‘rilmagan sur’atda jamg‘arishda davom etmoqda.
Xitoy Xalq banki tomonidan e’lon qilingan so‘nggi moliyaviy ma'lumotlar mamlakatning Amerika valyutasiga bog‘liqlikni kamaytirish va o‘z iqtisodiy xavfsizligini mustahkamlash strategiyasini ochiq namoyon qildi. Oltin xarididagi yangi rekordlar Xitoyning zaxiralarni dollardan xoli qilish va aktivlarni diversifikatsiyalash bo‘yicha amalga oshirayotgan harakatlari yangi bosqichga chiqdi.
Rasmiy statistikaga ko‘ra, Xitoy Xalq banki o‘tgan avgust oyida o‘z oltin zaxiralarini birdaniga 650 ming unsiyaga oshirishga muvaffaq bo‘ldi. Bu ko‘rsatkich so‘nggi yillar ichidagi eng yuqori natijalardan biri bo‘lib, mamlakatning qimmatbaho metallarga bo‘lgan ehtiyoji naqadar yuqori ekanligini ko‘rsatadi.
E’tiborli jihati shundaki, xalqaro birjalarda oltin narxi rekord darajada qimmatlashib borayotganiga qaramay, Pekin moliyaviy xarajatlarga qaramasdan jamg‘arish siyosatini faol ravishda davom ettirmoqda. Mazkur xarid bilan Xitoy Markaziy banki ketma-ket 22 oydan beri oltin sotib olishni to‘xtatgani yo‘q.
Mutaxassislarning fikricha, Xitoy o‘z vaqtida Amerika qarz majburiyatlaridan voz kechib, o‘rniga oltin jamg‘argan Rossiyaning moliyaviy modelini takrorlamoqda. AQSH obligatsiyalaridan voz kechish sabablari Xitoyning ushbu harakatlari Amerikaning davlat moliya tizimi uchun murakkab vaziyatni yuzaga keltirmoqda.
Hozirda Xitoy portfelidagi AQSH g‘aznachilik obligatsiyalarining umumiy ulushi 2001-yilgi, ya’ni Xitoy Jahon savdo tashkilotiga a’zo bo‘lgan davrdagi darajagacha qisqarib ketdi. Bu chorak asrlik minimal ko‘rsatkich hisoblanadi va dollar iqtisodiyoti uchun jiddiy signaldir.
Iqtisodiy tahlilchilarning ta’kidlashicha, Pekin aktivlarning muzlatib qo‘yilishi yoki ehtimoliy sanksiyalar xavfini hisobga olib, o‘z mablag‘larini AQSH dollari va Amerika moliyaviy vositalaridan shoshilinch ravishda chiqarib olmoqda. Hech bir tashqi kuch tomonidan bloklab bo‘lmaydigan jismoniy oltin aktivlari hozirda Xitoy uchun asosiy xavfsizlik kafolati bo‘lib xizmat qilmoqda.
Ushbu jarayon jahon moliya tizimida kuchlar nisbati o‘zgarayotganidan dalolat beradi.
