Andijon viloyati bojxona boshqarmasi matbuot xizmati tomonidan ma’lum qilinishicha, noqonuniy dori vositalari aylanmasining oldi olindi. Bu haqida Upl.uz xabar berdi.
Andijon viloyati bojxona boshqarmasining kontrabanda bilan kurashish bo‘limi xodimlari, Milliy xavfsizlik xizmati va ichki ishlar organlari bilan hamkorlikda maxsus tezkor tadbir o‘tkazdi. Tadbir davomida Andijon tumanida yashovchi shaxsning uyida tekshiruv o‘tkazildi.
Tekshiruv natijasida sifatsizligi haqidagi sertifikatlari bo‘lmagan jami 43 335 dona, 41 turdagi dori vositalari aniqlandi. Ularning umumiy qiymati 700 million so‘mdan ortiqni tashkil etdi.
Ushbu dorilar orasida “Solartin”, “Vinkorel”, “Tadazef 5” va “Vikon 1g” dori vositalari bor edi. Shuningdek, dorilar saqlashda belgilangan harorat rejimi buzilganligi aniqlanib, bu ularning sifatiga salbiy ta’sir ko‘rsatishi mumkinligi qayd etildi.
Mazkur holat bo‘yicha jinoyat ishi qo‘zg‘atilib, surishtiruv harakatlari davom ettirilmoqda. Tegishli organlar tomonidan qo‘shimcha choralar ko‘rilmoqda.
