O‘zbekiston Respublikasi Oliy Majlisi Qonunchilik palatasi ikkinchi o‘qishda portativ lazer nurlarini noqonuniy olib kirish, ishlab chiqarish, saqlash va foydalanishga nisbatan jiddiy jarimalarni belgilovchi qonun loyihasini ma’qulladi. Bu haqida Upl.uz xabar berdi.
Ushbu qonun loyihasi mamlakat hududida lazerlar noqonuniy aylanmasining ko‘payishi sababli ishlab chiqilgan. Bunday harakatlar fuqarolarning hayoti va sog‘lig‘iga, havo kemalarining xavfsizligiga hamda jamoat tartibiga katta xavf tug‘diradi.
O‘zbekiston Respublikasining ma’muriy javobgarlik kodeksiga kiritilgan yangi o‘zgartirishlarga ko‘ra, huquqbuzarlik turiga va uning jamoat xavfiga bog‘liqligiga qarab quyidagi jarimalar belgilandi: lazer nurlaridan noqonuniy foydalanish uchun 15 dan 25 bazaviy hisoblash miqdorigacha, ya’ni 6,1 dan 10,3 million so‘mgacha jarima; ularni ishlab chiqarish, tayyorlash va saqlash uchun 15 dan 30 bazaviy hisoblash miqdorigacha, ya’ni 6,1 dan 12,3 million so‘mgacha jarima; O‘zbekiston hududiga noqonuniy olib kirish uchun esa 25 dan 50 bazaviy hisoblash miqdorigacha, ya’ni 10,3 dan 20,6 million so‘mgacha jarima qo‘llaniladi. Mazkur qonun loyihasining qabul qilinishi lazer qurilmalarining nazoratsiz ishlatilishi muammosining jiddiyligini ko‘rsatadi.
Ayniqsa, yuqori quvvatli portativ lazerlar inson ko‘ziga qayta tiklanmas zarar yetkazishi, havo kemalari uchuvchilarining diqqatini chalg‘itishi va shu sababli parvoz xavfsizligiga tahdid solishi mumkin. Bundan tashqari, bunday qurilmalar jamoat tartibini buzish yoki jinoyat maqsadlarida ishlatilishi ehtimoli mavjud.
Katta jarimalarni joriy etish ushbu huquqbuzarliklarni oldini olish va ularning takrorlanishini kamaytirish uchun samarali mexanizm yaratishni maqsad qilgan. Bu esa, o‘z navbatida, noqonuniy lazer aylanmasi bilan bog‘liq hodisalarni kamaytirishga va mamlakatda jamoat xavfsizligini oshirishga yordam beradi.
👍 0❤️ 0😂 0😢 0😡 0
