O‘zbekiston Respublikasi oliy ta’lim, fan va innovatsiyalar vazirligi magistratura va doktorantura ta’limiga qabul qilishda til sertifikatining majburiyligi bekor qilinishi haqida ijtimoiy tarmoqlarda tarqalgan gap-so‘zlarga rasmiy izoh berdi. Bu haqida Upl.uz xabar berdi.
Vazirlik ushbu ma’lumotni qat’iyan rad etdi va til sertifikati talabining o‘z kuchida qolishini ta’kidladi. Mazkur tushunmovchilik Prezidentning 2025 yil 19 iyuldagi 114-sonli qarori mazmunining noto‘g‘ri talqin qilinishi natijasida yuzaga kelgan.
Vazirlik tushuntirishicha, ushbu qaror 2021 yil 19 maydagi Vazirlar Mahkamasi qarorining 6-bandining to‘rtinchi xatboshisini bekor qilgan. Ammo bekor qilingan band faqat til sertifikatlash tizimini joriy etishning dastlabki bosqichiga taalluqli bo‘lib, til sertifikatiga qo‘yilgan talabga ta’sir qilmaydi.
Bu o‘zgartirish texnik huquqiy xarakterga ega va qabul qoidalariga ta’sir qilmaydi. Hozirgi kunda magistratura va doktorantura dasturlariga qabul qilish talablari Prezidentning 2024 yil 24 maydagi 81-sonli qarori bilan aniq belgilangan.
Ushbu hujjat xorijiy tilni bilish darajasiga nisbatan farqlangan talablarni belgilaydi. Til bilish darajasi milliy yoki xalqaro sertifikat bilan tasdiqlanishi kerak.
Qarorga ko‘ra, minimal talab qilinadigan darajalar quyidagicha: - C1 (yuqori daraja) – chet tillari bilan bevosita bog‘liq mutaxassisliklarga qabul qilinayotgan abituriyentlar uchun majburiy. - B2 (o‘rta yuqori) – gumanitar, biologik fanlar, matematika va statistika, biznes va boshqaruv, huquq, ijtimoiy fanlar, jurnalistika va axborot-kommunikatsiya texnologiyalari kabi ko‘plab sohalar uchun talab etiladi.
- B1 (o‘rta) – madaniyat, san’at, sport va boshqa sohalar uchun belgilangan minimal daraja. Oliy ta’lim, fan va innovatsiyalar vazirligining rasmiy pozitsiyasi o‘zgarmagan bo‘lib, belgilangan namunadagi til sertifikatining mavjudligi magistratura va doktoranturaga kirish uchun shart hisoblanadi.
Sertifikat taqdim etmagan abituriyentlar tanlov jarayonida qatnasha olmaydi.
👍 0❤️ 0😂 0😢 0😡 0
