Toshkentda elektr uzilishlari sabablarini tekshirildi

O‘zbekiston Respublikasi Bosh prokuraturasi 24-25 iyul kunlari Toshkent shahrining turli tumanlarida kuzatilgan elektr ta’minotidagi uzilishlar bo‘yicha tekshiruv o‘tkazdi. Bu haqida Upl.uz xabar berdi.

Milliy axborot agentligi UzA xabariga ko‘ra, tekshiruv jarayonida tizimli texnik muammolar va tashkiliy kamchiliklar aniqlangan. Toshkentda elektr energiyasi iste’molchilarining soni 823 mingdan oshgan bo‘lib, bu ko‘rsatkich o‘tgan yilga nisbatan 47,6 mingga, 2025 yil boshidan esa 21 mingga ko‘paygan.

So‘nggi uch yil ichida shahardagi energiya sarfi 7,6 milliard kilovatt-soatdan 8,7 milliard kilovatt-soatga yetgan, yillik o‘sish taxminan 9 foizni tashkil etadi. Call-markazga (1154) faqat besh operator xizmat ko‘rsatgani sababli navbatlar 70 kishigacha yetgan.

Hozirda 10 nafar qo‘shimcha xodim jalb etilgan. 23 iyulda 64 ta avariya haqida iste’molchilarga hech qanday ma’lumot berilmagan, yana 112 ta holat bo‘yicha esa axborot kechikkan.

Tekshiruvdan so‘ng uzilishlar haqida bildirishnomalar hokimliklarning rasmiy saytlari va mashhur internet-kanallarda e’lon qilina boshlandi. “Toshkent shahar elektr tarmoqlari” korxonasida 78 ta avariya brigadasi va 34 ta maxsus texnika mavjud bo‘lib, bu shahar uchun yetarli emas.

Xodimlar soni 35 birlikga kamligi aniqlangan. So‘nggi uch yil ichida kompaniyadan 30 foiz xodim, jumladan 228 ta ekspluatatsiya mutaxassisi ketgan.

9,7 ming kilometrdan ortiq elektr tarmoqlarining 2,5 ming kilometri (26 foizi) eskirgan. 90 ta podstansiyadan 9 tasi modernizatsiya talab qiladi, 2 tasi quvvatini oshirish zarur.

11 ta laboratoriya mashinasidan faqat 2 tasi tun davomida ishlaydi, bu esa favqulodda holatlarni tez bartaraf etish imkoniyatini cheklaydi. Yangi 26 ta shtat birligi (muhandislar va haydovchi-laborantlar) joriy etilmoqda.

Zamonaviy 10 ta laboratoriya mashinasini xarid qilish rejalashtirilgan, ularning har biri taxminan 1 milliard so‘m turadi. Tekshiruv natijalari bo‘yicha “Toshkent shahar elektr tarmoqlari” rahbari, 11 ta tuman bo‘limi boshliqlari, 13 ta bosh muhandis va 3 ta dispetcher jumladan jami 28 nafar mas’ul shaxs intizomiy javobgarlikka tortildi.

Hozirda aniqlangan kamchiliklarni bartaraf etish ustidan nazorat davom etmoqda.