Amerika Qo‘shma Shtatlarida noimmigratsion vizalar uchun yangi qo‘shimcha yig‘im joriy etilishi e’lon qilindi. Bu haqida Upl.uz xabar berdi.
Ushbu yig‘im miqdori 250 dollarni tashkil etadi va «visa integrity fee» deb ataladi, ya’ni ishonchlilik uchun yig‘im. Bu chora «One Big Beautiful Bill Act» qonunining bir qismi bo‘lib, ushbu qonun joriy oy boshida AQSh prezidenti Donald Tramp tomonidan imzolangan.
Yangi moliyaviy majburiyat deyarli barcha xorijiy fuqarolarga ta’sir qiladi. Bu guruhga turizm, ish safari va Amerika ta’lim muassasalarida o‘qishga kelayotgan talabalar kiradi.
Davlat departamenti statistik ma’lumotlariga ko‘ra, 2024 moliyaviy yilida deyarli 11 million noimmigratsion viza berilgan, bu esa yangi yig‘imning potensial qamrovini ko‘rsatadi. Yig‘im miqdori inflyatsiya darajasiga qarab vaqti-vaqti bilan o‘zgartirilishi mumkin.
Yangi yig‘im mavjud konsullik to‘lovlariga qo‘shimcha sifatida olinadi. Faqat vizasi tasdiqlangan arizachilardan ushbu yig‘im talab qilinadi.
Agar viza rad etilsa, yig‘im olinmaydi. Masalan, Reddy Neumann Brown PC yuridik firmasi advokati Stiven Braunning aytishicha, H-1B vizasi uchun hozirda 205 dollar to‘layotgan mutaxassis yangi qoidalar kuchga kirgach jami 455 dollar to‘lashi kerak bo‘ladi.
Qonun qabul qilingan bo‘lsa-da, yig‘imni undirish boshlanish sanasi va to‘lov mexanizmi hozircha aniq emas. Qonunda buni amalga oshirish vazifasi Ichki xavfsizlik vazirligiga yuklatilgan.
Ammo tahlilchilar ta’kidlaganidek, ushbu vazirlik odatda viza arizalarini ko‘rib chiqish va berish bilan shug‘ullanmaydi, bu esa qonuniy va tashkiliy muammolarni keltirib chiqaradi. Davlat departamenti vakili CNNga bergan izohida yig‘imning maqsadi Tramp ma’muriyatining immigratsiya nazoratini kuchaytirish, viza qoidalarining buzilishining oldini olish va chegaralarni xavfsizligini ta’minlash choralarini moliyalashtirish ekanligini ma’lum qildi.
Qonun loyihasi to‘langan mablag‘larni qaytarib olish imkoniyatini ham nazarda tutadi. Sayohatchi mamlakatda qolish shartlariga to‘liq rioya qilganini isbotlasa, pulni qaytarib olish huquqiga ega bo‘ladi.
Asosiy talablar – noqonuniy ish faoliyati yo‘qligi va AQShni belgilangan muddatdan ko‘p bo‘lmagan besh kun ichida tark etishdir. Ammo pul faqat viza muddati tugagach qaytarilishi mumkin.
Ko‘plab noimmigratsion vizalar uzoq muddatli berilishi sababli, AQSh Kongressining Byudjet boshqarmasi bu imkoniyatdan kam odam foydalanadi, deb hisoblamoqda. AQShda 20 dan ortiq asosiy noimmigratsion viza turlari mavjud bo‘lib, ular ko‘plab kichik guruhlarga bo‘lingan.
Bu esa mamlakatga kirish uchun murakkab va ko‘p qavatli tizim hosil qiladi.
