Toshkent viloyati Ichki ishlar bosh boshqarmasi Yo‘l harakati xavfsizligi boshqarmasi matbuot xizmati xabariga ko‘ra, 28 iyul kuni Nurafshon shahrida yo‘l-patrul xizmati xodimlari tomonidan "Lacetti" rusumli avtomobil to‘xtatildi. Bu haqida Upl.uz xabar berdi.
Avtomobil haydovchisi 1998 yilda tug‘ilgan fuqaro bo‘lib, yo‘lovchi sifatida 2008 yilda tug‘ilgan shaxs bor edi. Haydovchining hujjatlari tekshirilayotganda yo‘lovchining harakati ichki ishlar xodimlarida shubha uyg‘otdi.
Shuning uchun uning shaxsiy ko‘rikdan o‘tkazilishi qaror qilindi. Ko‘rik davomida guvohlar ishtirokida o‘tkazilgan tekshiruvda, 2000 so‘mlik banknot ichida yashirilgan marixuana giyohvand moddasining aniqlanishi kuzatildi.
Mazkur holat yuzasidan tegishli hujjatlar rasmiylashtirildi va voyaga yetmagan shaxs ushlab turildi. Hozirda Nurafshon shahar ichki ishlar bo‘limida tergov harakatlari olib borilmoqda.
