Toshkentda 160 mln so‘mlik kontrabanda aniqlandi

Toshkent shahrida noqonuniy olib kirilgan mahsulotlar aniqlandi, deb xabar beradi Toshkent shahar bojxona boshqarmasi matbuot xizmati. Bu haqida Upl.uz xabar berdi.

Toshkent shahar bojxona boshqarmasining kontrabanda bilan kurashish bo‘limi xodimlari va Milliy xavfsizlik xizmati hamkorligida maxsus tezkor tadbir o‘tkazildi. Tadbir davomida Uchtepa tumanida yashovchi M.Y.ning uyi tekshirildi.

U kontrabanda mahsulotlarini sotishda gumon qilinayotgan edi. Uyda o‘tkazilgan tekshiruvda ko‘plab mahsulotlar, jumladan vazn yo‘qotishga mo‘ljallangan 166 qadoq qahva, 27 qadoq choy va 2749 dona turli intim mahsulotlar, jami 10 turdagi tovarlar topildi.

Aniqlangan va musodara qilingan mahsulotlarning umumiy qiymati 160 million so‘mni tashkil etdi. Musodara qilingan kontrabanda mahsulotlari qonuniy tartibda jinoyat ishi materiallariga qo‘shildi.

Hozirda mazkur holat bo‘yicha tergov harakatlari olib borilmoqda.