Andijon viloyati, Andijon tumanida yashovchi, 1997 yilda tug‘ilgan shaxs xalqaro terror tashkilotining tarafdori sifatida sud hukmi bilan jazoga hukm qilindi. Bu haqida Upl.uz xabar berdi.
U 2023 yildan boshlab ushbu terror tashkilotining targ‘ibotchilari ta’siri ostida bo‘lib, ijtimoiy tarmoqlardagi profillari orqali ularning materiallarini tarqatgan. Bundan tashqari, u ushbu guruhga qo‘shilish va qurolli to‘qnashuvlarda ishtirok etishni rejalashtirgan.
2023-2024 yillar davomida jinoyatchi xalqaro terrorchilarni moliyaviy jihatdan qo‘llab-quvvatlab, ularga 2912 AQSh dollari hamda 4,19 million so‘m miqdorida pul yuborgan. Shuningdek, u ikki marta Qirg‘iziston orqali Turkiyaga borib, jangarilar lagerida o‘qishga harakat qilgan, ammo Suriyaga kira olmagan.
Keyinchalik esa Eron orqali Afg‘onistonga o‘tishga uringan, biroq qo‘lga olingan. Andijon tuman sudi unga O‘zbekiston Respublikasi Jinoyat kodeksining “Terrorchilik faoliyati maqsadida o‘qish, chiqish yoki harakat qilish”ning birinchi qismi, “Terrorizmni moliyalashtirish”ning ikkinchi qismi, “Jamoat xavfsizligi va tartibiga tahdid soluvchi materiallarni tayyorlash, saqlash, tarqatish yoki namoyish qilish”ning uchinchi qismi hamda “Diniy ekstremistik, separatistik, fundamentalistik yoki boshqa taqiqlangan tashkilotlarni tuzish, boshqarish va ularda ishtirok etish”ning birinchi qismi bo‘yicha aybdor deb topdi.
Sud hukmi bilan unga sakkiz yil olti oy muddatga ozodlikdan mahrum qilish jazosi tayinlandi.
