O‘zbekiston Respublikasi Oliy Majlisi Senati infektsion kasalliklarning, xususan, OIV tarqalishini oldini olishga qaratilgan yangi qonunni ma’qulladi. Bu haqida Upl.uz xabar berdi.
Ushbu hujjatga muvofiq, ma’lum toifadagi fuqarolar uchun majburiy tibbiy ko‘rik joriy etiladi. Majburiy tibbiy ko‘rikdan o‘tishi kerak bo‘lganlar qatoriga 18 yoshdan 60 yoshgacha bo‘lgan, chet elda 90 kundan ortiq yashagan O‘zbekiston fuqarolari, mamlakatda doimiy yashovchi chet elliklar va fuqaroligi bo‘lmagan shaxslar, shuningdek, ish faoliyati uchun O‘zbekistonga kelayotgan chet elliklar va fuqaroligi bo‘lmagan shaxslar kiradi.
O‘zbekiston fuqarolari va doimiy yashovchi fuqaroligi bo‘lmagan shaxslar uchun tibbiy ko‘rik davlat byudjeti hisobidan amalga oshiriladi. Ish maqsadida kelgan yoki doimiy yashovchi chet elliklar va fuqaroligi bo‘lmagan shaxslar esa tibbiy ko‘rik xarajatlarini o‘zlari, ish beruvchi yoki boshqa manbalardan qoplashlari lozim.
Agar tibbiy ko‘rik natijasida OIV yoki sil aniqlansa, O‘zbekistonda ish faoliyatini amalga oshirish uchun ruxsat berilmaydi. Shuningdek, xususiy mehnat agentliklari chet elda ish izlayotgan fuqarolarga boradigan davlat qonunchiligiga rioya qilish qoidalari bo‘yicha o‘qitish majburiyatini oladi.
Senatorlar ta’kidlaganidek, mazkur qonun insonlar uchun xavfli bo‘lgan infektsion kasalliklarning oldini olish, aholining sog‘ligini muhofaza qilish hamda mehnat migratsiyasi jarayonida ijtimoiy himoyani ta’minlashga qaratilgan samarali huquqiy mexanizmlarni shakllantirishga xizmat qiladi.
