2023 yil 29 iyul kuni Toshkent – Delhi yo‘nalishidagi reysda bir yo‘lovchiga favqulodda tibbiy yordam zarur bo‘ldi. Bu haqida Upl.uz xabar berdi.
Samolyotda yuzaga kelgan bu vaziyat Toshkent davlat tibbiyot universiteti talabasi tomonidan muvaffaqiyatli hal etildi. Aviakompaniya vakillarining ma’lumotiga ko‘ra, reysda bir ayolning holati keskin yomonlashdi.
U yurak urishining tezlashuvi va bezovtalikdan shikoyat qildi. Samolyotda doimiy tibbiy xodim bo‘lmagani sababli ekipaj yo‘lovchilardan yordam so‘radi.
Yordam chaqirig‘iga Toshkent davlat tibbiyot universitetining xalqaro fakultetida tahsil olayotgan hindistonlik talabalar javob berdi. U samolyot sharoitida cheklangan imkoniyatlarga qaramay, ayolda yurak urishining tezlashuvi – taxikardiya belgilarini aniqladi.
Talaba bo‘yin arteriyasidagi karotid sinusi sohasiga massaj usulini qo‘llab, ayolning holatini barqarorlashtirdi. Delhi xalqaro aeroportiga yetib kelgach, yo‘lovchi tez yordam brigadasiga topshirildi va keyinchalik malakali tibbiy ko‘rikdan o‘tkazildi.
Aviakompaniya rahbariyati talabaning professional va tezkor harakatlari uchun minnatdorchilik bildirdi. Ushbu voqea O‘zbekistondagi tibbiyot ta’lim muassasalarining yuqori malakasini yana bir bor tasdiqladi.
Karotid sinus massaji yurak urishining tezlashuvi holatlarida yurak ritmini sekinlashtirishga yordam beruvchi vagus refleksiga asoslangan usullardan biridir. Biroq, bu usulni bajarish uchun maxsus bilim va ehtiyotkorlik talab etiladi, ayniqsa, keksa yoshdagi bemorlar uchun xavf tug‘dirishi mumkin.
Shuning uchun massajni faqat malakali mutaxassislar tomonidan amalga oshirish muhimdir.
