O‘zbekiston Favqulodda vaziyatlar vazirligi matbuot xizmati Surxondaryo viloyatida yuzaga kelgan yong‘in haqida ma’lumot berdi. Bu haqida Upl.uz xabar berdi.
4 avgust kuni soat taxminan 03:00 da Surxondaryo viloyati Favqulodda vaziyatlar boshqarmasiga Sho‘rchi tumanidagi "Bobotog" mahalla fuqarolar yig‘inida joylashgan savdo markazining birinchi va ikkinchi qavatlarida yong‘in haqida xabar kelib tushdi. Soat 03:15 da yong‘in o‘chirish va qutqaruv xizmatlari hodisa joyiga yetib borib, yong‘in bilan kurashishni boshladi.
Yong‘in binoning katta maydonini qamrab oldi, shuning uchun yong‘inni o‘chirishda 10 ta yong‘in o‘chirish va qutqaruv brigadalari hamda 2 ta yong‘in avtomashinasi jalb qilindi. Soat 05:10 da yong‘in mahalliylashtirildi, 07:30 da esa to‘liq o‘chirilgan.
Yong‘in oqibatida hech kim jarohat olmadi. Hozirda yong‘inning kelib chiqish sabablari va moddiy zarar miqdori aniqlanmoqda.
