Toshkent shahar IIBBning "Tezkor Tasvir" axborot dasturida xabar berilishicha, pul mablag‘larini o‘g‘irlash bilan bog‘liq jinoyat ishi ochildi. Bu haqida Upl.uz xabar berdi.
Joriy yilning 21 iyun kechasi soat 02:20 atrofida Mirabad tumani hududida ikki fuqaro tashkilot ofisiga kirib, u yerdan seyfni o‘g‘irlashgan. Jinoyatchilar seyfni oynadan tashqariga uloqtirib, o‘zlari bilan "Gentra" rusumli avtomobilga yuklashgan.
Keyinchalik ular jinoyatchilardan birining uyiga borib, burchakli arra yordamida seyfni kesib ochishgan va ichidan 560 ming AQSh dollarini olib ketishgan. Seyfda shuningdek, ikki dona fleshka va turli hujjatlar bo‘lgan.
Seyfni ochib bo‘lgach, jinoyatchilar uni shahar hududidan oqib o‘tuvchi kanalga uloqtirib, dalillarni yashirishga harakat qilishgan. O‘tkazilgan tezkor tadbirlar natijasida jinoyatchilarning shaxslari aniqlangan.
Ulardan biri Qirg‘izistonga qochishga uringan, ammo Andijon shahridagi mehmonxonalardan birida ushlangan. Jinoyatchilardan 440 ming AQSh dollari va o‘g‘irlangan pul evaziga sotib olingan yangi "Honda" motosikli topilgan.
Mazkur holat bo‘yicha O‘zbekiston Respublikasi Jinoyat kodeksining "O‘g‘irlik" moddasi bo‘yicha jinoyat ishi qo‘zg‘atilgan. Hozirda tergov ishlari davom etmoqda.
