O‘zbekiston poytaxtida tez tibbiy yordam brigadalarining harakatini real vaqt rejimida kuzatish imkonini beruvchi pilot loyiha ishga tushirildi. Bu haqida Upl.uz xabar berdi.
Ushbu tashabbus Respublikamiz Tez tibbiy yordam markazi tomonidan Yandex Uzbekistan bilan hamkorlikda amalga oshirildi. Loyihaning asosiy maqsadi favqulodda xizmatlarning faoliyatini oshkoralik bilan ta’minlash va ularning ish samaradorligini yaxshilashdir.
Hozirda Toshkent shahrida sinov tariqasida ishlayotgan yangi tizim yordamida yordam chaqirgan fuqarolarga maxsus havola bilan SMS xabari yuboriladi. Ushbu havola orqali brauzerda tez tibbiy yordam mashinasining xarita bo‘yicha harakatini kuzatish mumkin.
Bu esa, yordam kelishini taxminiy vaqtini aniqlash va tibbiyot xodimlarini kutishga oldindan tayyorlanish imkonini beradi. Ushbu texnologik yechim nafaqat yordam kutayotganlarni tinchlantirishga, balki markazlarning operatorlari yukini sezilarli darajada kamaytirishga qaratilgan.
Respublika tez tibbiy yordam markazi ma’lumotlariga ko‘ra, mamlakat bo‘ylab operatorlar kuniga 40 minggacha qo‘ng‘iroqni qayta ishlaydi, shundan taxminan 60 foizi favqulodda holatlarga to‘g‘ri keladi. Mustaqil kuzatuv imkoniyati takroriy qo‘ng‘iroqlar sonini kamaytiradi.
Markaz direktori Abduvoitjon G‘afurov raqamlashtirish jarayonlari aholi uchun xizmatlarni yanada qulay va tushunarli qilishiga umid bildirdi. Unga ko‘ra, brigadaning harakatini kuzatish imkoniyati yordam kelishiga tayyorlanishni tezlashtiradi va operatorlarga tushadigan yukni kamaytiradi.
Loyihaning keyingi bosqichlarida tizimni Yandex Go mobil ilovasi bilan integratsiya qilish rejalashtirilmoqda. Bu orqali foydalanuvchilar push-xabarnomalar yordamida brigadaning aniq joylashuvi va kelish vaqti haqida ma’lumot oladi.
Shuningdek, ilovadan oila a’zolari yoki yaqinlarga ushbu ma’lumotlarni ulashish imkoniyati paydo bo‘ladi, bu esa favqulodda vaziyatlarda ayniqsa muhimdir. Hozirda tizim faqat Toshkent shahrida favqulodda chaqiriqlar uchun sinov tariqasida ishlamoqda.
Biroq markaz rahbariyati uni mamlakatning boshqa hududlariga kengaytirish imkoniyatlarini ko‘rib chiqmoqda. Maqsad – tez tibbiy yordam sifatini, mavjudligini va tezkorligini barcha fuqarolar uchun oshirishdir.
Dunyo tarixida birinchi markazlashtirilgan tez tibbiy yordam xizmati 1881 yilda Avstriyaning Vena shahrida yirik yong‘in voqeasidan so‘ng tashkil etilgan.
