Uzenergoinspeksiya matbuot xizmati tomonidan berilgan ma’lumotga ko‘ra, noqonuniy elektr energiyasi iste’moli to‘xtatildi. Bu haqida Upl.uz xabar berdi.
Samarqand viloyati Uzenergoinspeksiya boshqarmasi xodimlari tomonidan nazorat tadbirlari o‘tkazildi. Tadbirlar davomida Bulung‘ur tumanida faoliyat yuritayotgan yakka tartibdagi tadbirkor A.D.ning faoliyati tekshirildi.
Tekshiruv natijasida, tadbirkor o‘z faoliyatida zarur bo‘lgan elektr uskunalarini elektr ta’minoti tashkiloti bilan shartnoma tuzmasdan, jamoat tarmog‘iga noqonuniy ulanganligi aniqlangan. Ushbu qonunbuzarlik natijasida elektr ta’minoti tashkilotiga jami 3 milliard 261 million so‘m zarar yetkazilgan.
Hozirda huquqni muhofaza qiluvchi organlar tomonidan dastlabki tergov harakatlari olib borilmoqda. Yakka tartibdagi tadbirkorga O‘zbekiston Respublikasi Jinoyat kodeksining 166-moddasi 4-qismi bo‘yicha, ya’ni o‘g‘rilik jinoyati uchun 15 yilgacha ozodlikdan mahrum qilish jazosi qo‘llanilishi mumkin.
Ushbu holat qonuniylikni ta’minlash va elektr energiyasidan noqonuniy foydalanishni oldini olish maqsadida qat’iy nazorat ostida davom ettirilmoqda.
