Uzenergoinspektsiya matbuot xizmati tomonidan ma’lum qilinishicha, Surxondaryo viloyati Uzenergoinspektsiyasi boshqarmasi xodimlari hamda gaz ta’minoti korxonasi mutaxassislari bilan hamkorlikda Denov shahrida nazorat tadbirlari o‘tkazildi. Bu haqida Upl.uz xabar berdi.
Ushbu tadbirlar davomida “I. I.” nomli xususiy korxonaning oshxonasi tabiiy gaz tarmog‘iga noqonuniy ravishda yashirincha ulanganligi aniqlandi.
Bu holat gaz ta’minoti korxonasiga jami 477,9 million so‘m zarar yetkazganligi tasdiqlandi. Aniqlangan holat yuzasidan barcha hujjatlar huquqni muhofaza qiluvchi organlarga taqdim etildi va aybdor shaxslarning qonuniy javobgarlikka tortilishi uchun chora ko‘rilmoqda.
Jinoyat kodeksining 166-moddasi 4-qismi bo‘yicha o‘g‘rilik jinoyati sifatida baholanib, aybdorlarga 15 yilgacha ozodlikdan mahrum etish jazosi qo‘llanilishi mumkin.
