Toshkent shahrining Yunusobod tumanida ichki ishlar organlari xodimlari tomonidan alkogol ta’siri ostida jamoat tartibini buzgan va ularga qarshilik ko‘rsatgan ikki nafar erkak ushlangan. Bu haqida Upl.uz xabar berdi.
Bu haqda poytaxt IIBB matbuot xizmati xabar berdi. Hodisa 2025 yil 5 avgust kuni soat 21:30 atrofida yuz bergan.
Navbatchilik qismiga Chinobod ko‘chasida janjal qilayotgan ikki mast holatdagi fuqaro to‘g‘risida xabar kelib tushgan. Voqea joyiga profilaktika inspektori va patrul-post xizmati xodimlari yetib borgan.
Biroq, 1981 va 1973 yillarda tug‘ilgan erkaklar qonuniy talablarni bajarmay, agressiv xulq-atvorini davom ettirgan. Natijada, tartib buzganlar ushlangan va bo‘limga olib borilgan.
Ularga O‘zbekiston Respublikasi Ma’muriy javobgarlik kodeksining uchta moddasiga asosan ma’muriy bayonnomalar tuzilgan: 183-moddaga (kichik bezorilik), 194-moddaga (ichki ishlar organlari xodimining qonuniy talablarini bajarmaslik), 195-moddaga (ichki ishlar organlari xodimlarining xizmat vazifalarini bajarishiga qarshilik ko‘rsatish). Mazkur ish materiallari Yunusobod tumanining jinoyat ishlari bo‘yicha sudiga yuborilgan va tegishli qaror qabul qilinishi kutilyapti.
