O‘zbekiston Respublikasi hududida 12-13 avgust kunlari xorijiy yoki nodavlat ta’lim muassasalaridan davlat oliy ta’lim muassasalariga o‘qishni ko‘chirishni istagan talabalar uchun professional (ijodiy) imtihonlar o‘tkaziladi. Bu haqida Upl.uz xabar berdi.
Ushbu imtihonlar maxsus ijodiy qobiliyatlarni talab qiluvchi yo‘nalishlar bo‘yicha tashkil etiladi. Imtihonda ishtirok etish uchun talabalar my.uzbmb.uz saytidagi shaxsiy kabinetlaridan kirish guvohnomasini yuklab olishlari lozim.
Kirish guvohnomasida imtihonning aniq sanasi, vaqti hamda o‘tkazilish joyi ko‘rsatilgan. Imtihon kuni ishtirokchilar o‘z vaqtida kelishlari, shaxsini tasdiqlovchi pasport yoki ID-karta va kirish guvohnomasini o‘zlari bilan olib kelishlari zarur.
Shuni ta’kidlash joizki, ijodiy imtihon natijalari faqat talabalar ona tili, matematika va O‘zbekiston tarixi fanlaridan majburiy testlarni muvaffaqiyatli topshirgandan so‘ng hisobga olinadi. Ushbu testlardan o‘tmagan taqdirda ijodiy imtihon natijalari bekor qilinadi.
