Raqobatni rivojlantirish va iste’molchilar huquqlarini himoya qilish qo‘mitasi matbuot xizmati xabariga ko‘ra, “Reklama to‘g‘risida”gi qonunni buzgan blogerlar haqida chora ko‘rilmoqda. Bu haqida Upl.uz xabar berdi.
Qo‘mita doimiy ravishda ijtimoiy tarmoqlar va internet resurslarida O‘zbekiston Respublikasining “Reklama to‘g‘risida”gi qonunining bajarilishini monitoring qilmoqda. Monitoring natijasida yuz minglab obunachilari bo‘lgan blogerlar tomonidan qonun bilan taqiqlangan bukmekerlik idoralari reklamasini amalga oshirgan holatlar aniqlandi.
Mazkur reklama ko‘pincha bevosita ko‘rinishda bo‘lmay, tabiiy uslubda taqdim etiladi. Shu asosda, blogerlar Hakimov A.F.
(amirxon_uzbek) va Ilyosov D.M. (donik_krash) tomonidan "***bet" bukmekerlik idorasi reklamasini o‘z ichiga olgan videolar hamda qimor o‘yinlarini targ‘ib qiluvchi kadrlar aniqlangan.
Ularning harakatlari yuzasidan ma’muriy hujjatlar rasmiylashtirilib, qonuniy qaror qabul qilinishi uchun sudga yuborilgan. Qo‘mita vakillari ta’kidlaganidek, O‘zbekiston Respublikasining “Reklama to‘g‘risida”gi qonuni har qanday qimor o‘yinlari reklamasini qat’iyan man etadi va bunday qonunbuzarliklarga nisbatan tegishli choralar ko‘riladi.
Shu bois, blogerlar va internetdagi boshqa foydalanuvchilar qonun talablariga rioya qilishlari zarur.
