Toshkent shahar Favqulodda vaziyatlar boshqarmasi matbuot xizmatidan olingan ma’lumotga ko‘ra, 12 avgust kuni soat 12:00 atrofida Bektemir tumani, Rohat ko‘chasida joylashgan ko‘p kvartirali uylarning birida yong‘in yuz berdi. Bu haqida Upl.uz xabar berdi.
Yong‘in yettinchi qavatdagi kvartirada tarqaldi. Soat 12:06 da voqea joyiga uchta yong‘in-qutqaruv brigadasi va ikki ta avtolestnitsa yetib keldi.
Yong‘in o‘chirish xizmatining tezkor va samarali harakatlari natijasida soat 12:12 da yong‘in to‘liq bartaraf etildi. Mazkur hodisa oqibatida hech kim jarohat olmadi.
Yong‘in natijasida 20 kvadrat metr maydondagi kvartiraning mebellari va ichki bezak buyumlari zarar ko‘rdi. Yong‘inning kelib chiqish sabablari hozirda aniqlanmoqda.
Favqulodda vaziyatlar boshqarmasi fuqarolarga yong‘in xavfsizligi qoidalariga qat’iy rioya qilishni tavsiya qiladi.
