Favqulodda vaziyatlar vazirligi matbuot xizmatida ma’lumot berildi. Bu haqida Upl.uz xabar berdi.
13 avgust kuni soat 13:00 larda Surxondaryo viloyati Favqulodda vaziyatlar boshqarmasiga Shurchin tumani “Okkurgon” mahallasida joylashgan suyuqlashtirilgan gaz quyish shoxobchasida yong‘in haqida xabar kelib tushdi. Soat 13:07 da voqea joyiga sakkizta yong‘in-qutqaruv guruhi yetib bordi va yong‘inni o‘chirishga kirishdi.
Bir daqiqa ichida yong‘in mahalliylashtirildi, soat 13:16 da esa to‘liq bartaraf etildi. Dastlabki ma’lumotlarga ko‘ra, yong‘in avtotanki orqali propan gazini quyish jarayonida texnologik qoidalar buzilishi natijasida yuzaga kelgan.
Yong‘inning aniq sabablari va moddiy zarar miqdori tergov jarayonida aniqlanadi. Voqea joyiga viloyat va tuman Favqulodda vaziyatlar boshqarmalari rahbarlari kelishdi.
Favqulodda vaziyatlar boshqarmasi jabrlanganlar borligi haqida ma’lumot bermadi.
