Andijon viloyati Ichki ishlar bosh boshqarmasi matbuot xizmatining xabar berishicha, Shaxrixon tumanida o‘tkazilgan tezkor tadbir davomida ikki nafar jinoyatga aloqador shaxs qo‘lga olindi. Bu haqida Upl.uz xabar berdi.
Ular mevali bog‘ hududida xo‘roz janglarini tashkil qilgan. Ichki ishlar organlari xodimlari tomonidan olib borilgan maxsus operatsiyalar natijasida ushbu shaxslar noqonuniy o‘yin maydonchasini yaratib, tomoshabinlardan pul yig‘ib, garovlar qabul qilganlari aniqlangan.
Operativ tadbir vaqtida noqonuniy maskanda o‘nlab tomoshabinlar bo‘lgan. Tadbirda ikki xo‘roz, 300 AQSh dollari va 1 377 000 so‘m pul mablag‘lari musodara qilindi.
Ushbu holat yuzasidan O‘zbekiston Respublikasi Jinoyat kodeksining "Qimor o‘yinlarini tashkil etish va o‘tkazish" moddasining birinchi qismi bo‘yicha jinoyat ishi qo‘zg‘atildi. Jinoyatga aloqador shaxslarga yetti yilgacha ozodlikdan mahrum qilish jazosi qo‘llanilishi mumkin.
Tergov ishlari davom etmoqda.
