Buxoro viloyatida sobiq sevgilisidan katta miqdorda pul talab qilgan shaxs qo‘lga olindi. Bu haqida Upl.uz xabar berdi.
U ayolning shaxsiy fotosuratlari va videolarini oila a'zolari hamda hamkasblar orasida tarqatib yuborish bilan qo‘rqitgan. Viloyat Ichki ishlar boshqarmasi matbuot xizmati xabariga ko‘ra, jinoyatchi pulni topshirayotgan vaqtida ushlangan.
Hodisa Qarolbozor tumanida sodir bo‘lgan. 39 yoshli erkak ayol bilan munosabatda bo‘lgan paytda uning shaxsiy fotosuratlari va videolarini yashirincha olgan.
Munosabat tugagach, u ushbu materiallardan shantaj qilish uchun foydalangan. Jinoyatchi tanishi orqali sobiq sevgilisiga kompromat materiallarini yuborgan va 100 million so‘m talab qilgan.
Agar pul berilmasa, u ushbu ma’lumotlarni yaqinlari va hamkasblari orasida oshkor qilishini aytgan. Ayol darhol huquqni muhofaza qilish organlariga murojaat qilgan.
9 avgust kuni IIB xodimlari operatsiya o‘tkazib, aytilgan summaning 40 million so‘mini olgan paytda shaxsni qo‘lga olgan. Mazkur holat yuzasidan O‘zbekiston Respublikasi Jinoyat kodeksining 165-moddasi, 2-qismi (Talab qilish) bo‘yicha jinoyat ishi qo‘zg‘atildi.
Gumonlanuvchiga 10 yilgacha ozodlikdan mahrum qilish jazosi qo‘yilishi mumkin. Hozirda ish yuzasidan barcha holatlar aniqlanmoqda.
