Farg‘ona viloyati ichki ishlar boshqarmasi matbuot xizmati xabariga ko‘ra, talab qilib pul olgan shaxs qo‘lga olindi. Bu haqida Upl.uz xabar berdi.
12 avgust kuni ichki ishlar organlari xodimlari tomonidan maxsus tezkor tadbir o‘tkazildi. Tadbir davomida erkak shaxs ushlangan bo‘lib, u oldindan maxsus kimyoviy modda bilan ishlangan 1200 AQSh dollarini olganligi ma’lum bo‘ldi.
Aniqlanishicha, ushbu shaxs pul talab qilib, qizni intim mazmundagi videolavhalarni tarqatish bilan qo‘rqitgan. Mazkur holat bo‘yicha O‘zbekiston Respublikasi Jinoyat kodeksining “Talab qilib pul olish” moddasi bo‘yicha jinoiy ish qo‘zg‘atilgan.
Hozirda tergov harakatlari olib borilmoqda. Ushbu modda bo‘yicha eng kam jazolaridan biri 5 yilgacha ozodlikdan mahrum qilishdir.
