Toshkent shahar IIBB matbuot xizmati xabariga ko‘ra, giyohvand moddalar noqonuniy aylanmasida ishtirok etgan shaxslar qo‘lga olindi. Bu haqida Upl.uz xabar berdi.
Ichki ishlar organlari xodimlari tomonidan Yangihayot tumani hududida maxsus tezkor tadbir o‘tkazildi. Tadbir davomida uch nafar erkak shaxsning shaxsiy ko‘riklari va yashash joylari tekshirildi.
Tekshiruvda ularning o‘zida hamda uylarda katta miqdorda turli giyohvand moddalar aniqlanib, jami 4,55 kilogramm giyohvand modda musodara qilindi. Shulardan biri aniqlangan giyohvand moddalarning shaxsiy ehtiyojlari uchun saqlangani haqida ma’lumot berdi.
Mazkur holat bo‘yicha O‘zbekiston Respublikasi Jinoyat kodeksining 273-moddasi 5-qismi — “Giyohvand moddalarni noqonuniy ishlab chiqarish, sotib olish, saqlash va boshqa harakatlar, shu jumladan ularni sotish” bo‘yicha jinoyat ishi qo‘zg‘atildi. Hozirda ushbu shaxslar protsessual tartibda ushlangan bo‘lib, ularga 20 yilgacha ozodlikdan mahrum qilish jazosi qo‘llanilishi mumkin.
Ichki ishlar organlari tomonidan qonuniylikni ta’minlash va giyohvandlikka qarshi kurashishda barcha zarur choralar ko‘rilmoqda.
