Buxoro viloyati Favqulodda vaziyatlar boshqarmasi matbuot xizmatidan olingan ma’lumotga ko‘ra, joriy yilning 19 avgust kuni soat 00:45 da Buxoro shahridagi Mustaqillik ko‘chasida joylashgan ikki qavatli “Zarafshon” kafesida yong‘in yuz berdi. Bu haqida Upl.uz xabar berdi.
Hodisa joyiga 4 daqiqa ichida beshta yong‘in-qutqaruv bo‘linmalari yetib borib, o‘t o‘chirish ishlari boshlandi. Yong‘in asosan binoning ikkinchi qavatini qamrab oldi.
Soat 00:53 da yong‘in lokalizatsiya qilindi, to‘liq o‘chirish ishlari esa soat 01:50 da yakunlandi. Yong‘in natijasida bino tomining 100 kvadrat metr maydoni zarar ko‘rdi.
Aholi orasida jabrlanganlar yo‘q. Yong‘inning kelib chiqish sabablari va moddiy zarar miqdori hozirda tergov jarayonida aniqlanmoqda.
Favqulodda vaziyatlar boshqarmasi hodisa yuzasidan barcha zarur choralarni ko‘rmoqda hamda aholini xavfsizlik qoidalariga rioya qilishga chaqirmoqda.
