Toshkent shahar Favqulodda vaziyatlar boshqarmasi matbuot xizmatida ma’lumot e’lon qilindi. Bu haqida Upl.uz xabar berdi.
19 avgust kuni soat 11:00 larda poytaxtning Olmazor tumani, Zarkaynar ko‘chasida joylashgan Islom sivilizatsiyasi markazi binosining tomida yong‘in yuz berdi. Hodisa joyiga Favqulodda vaziyatlar xizmati xodimlari zudlik bilan yetib kelib, yong‘inni o‘chirishga kirishdilar.
Soat 11:32 da yong‘in mahalliylashtirilib, ikki daqiqadan so‘ng to‘liq o‘chirilgan. Dastlabki ma’lumotlarga ko‘ra, yong‘inning sababi issiqlik izolyatsiyasi materiallarini o‘rnatish jarayonida texnologik qoidalar buzilishi bo‘ldi.
Yong‘in natijasida binoning tomida 19 kvadrat metr issiqlik izolyatsiyasi materiali zarar ko‘rdi. Halokatda hech kim jarohat olmadi.
Favqulodda vaziyatlar boshqarmasidan bildirilishicha, binoda noyob eksponatlar saqlanmagan. Hodisa joyiga O‘zbekiston Respublikasi Bosh vaziri Abdulla Aripov tashrif buyurib, yong‘inning oqibatlari bilan tanishdi.
Ushbu holat yuzasidan zarur chora-tadbirlar ko‘rilmoqda.
