Toshkent shahrida 43 yoshli erkak Poytaxt Parking kompaniyasining eshitish va nutq qobiliyati cheklangan inspektorini haqorat qilgani uchun uch kunga ma’muriy qamoqqa olindi. Bu haqida Upl.uz xabar berdi.
Ushbu holat 29 iyul kuni yuz bergan bo‘lib, 8 avgust kuni Mirabad tumanining jinoyat ishlari bo‘yicha sudida ko‘rib chiqildi. Poytaxt Parking kompaniyasi vakillari ma’lum qilishicha, haydovchilarning inspektorlarni, jumladan nogironligi bo‘lganlarni haqorat qilishi holatlari afsuski kam uchramaydi.
Kompaniya inspektorlarida o‘rnatilgan bodikameralar voqeani aniq qayd etadi va sudda asosli dalil sifatida taqdim etiladi. Sud ma’lumotlariga ko‘ra, ayblanuvchi avval ham ma’muriy javobgarlikka tortilgan va jinoyat sodir etilgan paytda alkogol ta’siri ostida bo‘lgan.
U haqoratli so‘zlar aytib, qo‘l harakatlari bilan bezovta qilgan, hatto inspektorga pora taklif qilishga uringan. Inspektor esa unga infokiosk orqali to‘lovni qanday amalga oshirishni ko‘rsatgan.
Sudda erkak o‘z aybini tan olib, oilaviy muammolar tufayli hissiy zo‘riqish holatida bo‘lganini bildirgan va suddan kechirim so‘ragan. Biroq sud G.
X.ni ma’muriy javobgarlik kodeksining 183-moddasi bo‘yicha mayda bezorilikda aybdor deb topib, uch kunlik ma’muriy qamoq jazosi tayinladi. Shuningdek, erkakning rasmiy ish joyining yo‘qligi inobatga olinib, maxsus qabulxonada saqlanish uchun to‘lovdan ozod etildi.
Poytaxt Parking vakillari ta’kidlaganlaricha, inspektorga nisbatan noo‘rin munosabat faqat odobsizlik emas, balki jarima, qamoq yoki jinoiy javobgarlikka olib kelishi mumkin. Har bir inspektor bodikamera bilan jihozlangan bo‘lib, har bir so‘z va harakat yozib boriladi.
Savollaringiz bo‘lsa, call-markazga murojaat qiling, lekin inspektorga qo‘l ko‘tarmang va haqorat qilmang, chunki bunday xatti-harakatlar qonun oldida javobgarlikni talab qiladi.
