Toshkent shahrida noqonuniy ravishda soxta dori vositalari ishlab chiqarilgan yashirin sex faoliyati bo‘yicha yangi ma’lumotlar ma’lum qilindi. Bu haqida Upl.uz xabar berdi.
Bu haqda O‘zbekiston Respublikasi Davlat xavfsizlik xizmati matbuot xizmati xabar berdi. Davlat xavfsizlik xizmati xodimlari va Iqtisodiy jinoyatlarga qarshi kurashish boshqarmasi bilan hamkorlikda poytaxtda tezkor tadbir o‘tkazildi.
Tekshiruv davomida biologik faol qo‘shimchalar ishlab chiqarishga ixtisoslashgan mas’uliyati cheklangan jamiyatga tegishli bino ichida noqonuniy ravishda soxta dori vositalari tayyorlangan yashirin sex aniqlangan. Mazkur sexda 11 ta dori ishlab chiqarish uskunasi, 21 ta tabletkalar uchun qolip, umumiy og‘irligi 389 kilogramm bo‘lgan kukun va tabletkalar, shuningdek, Raikal markali pnevmatik qurol va boshqa buyumlar musodara qilingan.
Bundan tashqari, xuddi shu korxona binosida joylashgan ikkinchi sexda ham uskunalar, qoliplar, bo‘sh kapsulalar va qadoqlar, ko‘rsatmalar hamda kukun shaklidagi xom ashyo topilib, protsessual tartibda olib qo‘yilgan. Davlat farmatsevtika xavfsizligi markazi ekspertlari xulosasiga ko‘ra, yashirin sexlarda «Ursosan 250 mg», «Neyromidin 20 mg» va «Fanigan» dori vositalari soxtalashtirilgan.
Keyingi tekshiruvlar doirasida «Fanigan» mahsulotining soxtasini buyurtma qilgan va uning 130 kilogramm moddasini yetkazib bergan dorixona ham nazoratga olingan. Ushbu dorixona 15 turdagi jami 1067 qadoq soxta dori vositalari, jumladan «Fanigan», «Azimak» va «Tsiprolet» hamda 14 turdagi 274 qadoq amal qilish muddati o‘tgan dori-darmon bilan aniqlangan.
Noqonuniy ishlab chiqarishni tashkil qilgan uch nafar shaxsga nisbatan O‘zbekiston Respublikasi Jinoyat kodeksining 186-3-moddasi, 2-qismining «b» va «g» bandlari bo‘yicha jinoyat ishi ochilgan. Hozirda tergov harakatlari davom ettirilmoqda.
