Davlat xavfsizlik xizmati matbuot xizmati tomonidan oltin bezaklar kontrabandasining aniqlangani haqida ma’lumot berildi. Bu haqida Upl.uz xabar berdi.
Chegara qo‘shinlari xodimlari hamda Farg‘ona viloyati bojxona boshqarmasi vakillari bilan hamkorlikda maxsus tezkor tadbir o‘tkazildi. Tadbir davomida Farg‘ona tumani, 1991 va 1993 yillarda tug‘ilgan ikki nafar fuqarosi qo‘lga olindi.
Ular Qirg‘izistondan noqonuniy ravishda 19 kilogramm 119 gramm oltin bezaklarni davlat chegarasidan o‘tkazishga uringanlari aniqlangan. Ushbu oltin bezaklarning dastlabki qiymati taxminan 20 milliard so‘mni tashkil etadi.
Hozirda musodara qilingan barcha oltin buyumlari ekspertizadan o‘tkazilmoqda. Jinoyat ishi qo‘zg‘atish masalasi hal qilinmoqda.
Ushbu holat qonuniy tartibda tekshirilib, zarur chora-tadbirlar ko‘rilmoqda.
