Toshkentlik fuqaro majburiy ijro byurosini aldash maqsadida o‘zining Lacetti rusumli avtomobilini Namangan viloyatidagi jarima maydonchasiga yashirib qo‘ygan. Bu haqida Upl.uz xabar berdi.
Toshkent shahar majburiy ijro byurosining matbuot xizmati tomonidan ushbu avtomobil “qidiruvdagi transport vositasi” deb e’lon qilindi. Mazkur ish Toshkent shahri ikkinchi tumanlararo bo‘limiga Lacetti avtomobil egasiga nisbatan ijro hujjati kelib tushishi bilan boshlandi.
Fuqaroga nisbatan yo‘l harakati qoidalarini 61 marta buzganligi uchun jami 23 million so‘m miqdorida jarima undirilgan edi. Majburiy ijro byurosining ko‘p marotaba ogohlantirish va xabarnomalari natijasiz qarzdor o‘z majburiyatini bajarmadi.
Shundan so‘ng uning avtomobilini qidiruvga berish to‘g‘risida qaror qabul qilindi. Surishtiruv jarayonida aniqlanishicha, fuqaro jarimalarni to‘lash o‘rniga avtomobilni boshqa hududga olib ketib, Chust tumanidagi maxsus jarima maydonchasiga qo‘ygan.
U shu tarzda avtomobilning musodara qilinishidan qochishga harakat qilgan. Ammo bu reja amalga oshmadi.
Operativ tadbirlar natijasida Lacetti avtomobilining joylashuvi aniqlanib, egasiga qarzdorlikni to‘liq to‘lash yoki avtomobilni majburiy savdoga chiqarish haqida tanlov qoldirildi. Savdodan tushgan mablag‘lar jarimalarni qoplashga yo‘naltiriladi.
