Davlat xavfsizlik xizmati xodimlari tomonidan Namangan viloyatining bir tumanida maktabgacha va maktab ta’limi bo‘limining rahbari hamda ikki nafar xususiy bog‘cha rahbarlari jinoyat uyushtirganligi aniqlanib, uch nafar ayol ushlangan. Bu haqida Upl.uz xabar berdi.
Ular boshqa bir fuqaroning davlat bog‘chalaridan birida bo‘lim mudiri lavozimiga ishga joylashishi uchun 2500 AQSh dollari miqdorida pora olishga kelishib olganlar. Operativ tadbirlar davomida barcha ishtirokchilar qo‘lga olindi.
Avvalo, 2500 dollar xususiy bog‘chalardan birining rahbariga berilgan, so‘ngra u pulning bir qismini ikkinchi bog‘cha rahbariga topshirgan. Keyinchalik, 1000 dollar maktabgacha va maktab ta’limi bo‘limining yuqori martabali xodimiga yetkazilgan.
Mazkur holat yuzasidan O‘zbekiston Respublikasi Jinoyat kodeksining firibgarlik va pora berish moddalariga asosan jinoyat ishi qo‘zg‘atildi. Ayblanuvchilarga sakkiz yilgacha ozodlikdan mahrum qilish jazosi qo‘llanilishi mumkin.
