O‘zbekiston fuqarolari qidiruvdan topilib, Toshkentga olib kelindi, deb xabar beradi Ichki ishlar vazirligi matbuot xizmati. Bu haqida Upl.uz xabar berdi.
Toshkent va Anqara Interpol milliy markaziy byurolari xodimlari hamkorlikda Interpol yo‘nalishida qidirilayotgan shaxslarni aniqlashga qaratilgan tezkor-qidiruv tadbirlarini o‘tkazdilar. Natijada, inson savdosi, katta miqdordagi firibgarlik va boshqa og‘ir jinoyatlarda gumon qilingan olti nafar shaxs qo‘lga olindi.
Qo‘lga olingan shaxslar jinoyat javobgarligidan qochish maqsadida Turkiya hududida yashirinib yurgan, ammo ular topilib, ushlangan. Toshkentga ular Anqara Interpoli va Turkiya Jandarmeriya xodimlari hamrohligida olib kelingan.
Toshkentga yetib kelganidan so‘ng, barcha shaxslar Toshkentdagi Interpol byurosi hamda ichki ishlar organlari xodimlariga topshirildi. Yaqin kunlarda ushbu shaxslar ustidan tergov harakatlari qayta boshlanadi.
Tergov natijalari bo‘yicha ayblov xulosasi tayyorlanib, barcha ish materiallari bilan birga sudga yuboriladi.
