Jinoyat ishlari bo‘yicha departamentning matbuot xizmati tomonidan ma’lum qilinishicha, kuchli ta’sir qiluvchi dori vositalarini noqonuniy aylanishga kiritilishining oldi olindi. Bu haqida Upl.uz xabar berdi.
Yangihayot tumani bo‘yicha departament xodimlari tomonidan maxsus tezkor tadbir o‘tkazildi. Tadbir davomida Toshkent shahrining Yakkasaroy tumanidagi “Kushbegi” mahallasida joylashgan “N.A.” MChJ aptekasining farmatsevt xodimi 50 dona kuchli ta’sir qiluvchi “Omnadren 250” dori vositasini shifokor retsepti bo‘lmasdan 3 million so‘mga sotayotgan vaqtida ushlangan.
Shuningdek, Surxondaryo viloyatida 200 dona kuchli ta’sir qiluvchi “Benzonal” dori vositasini noqonuniy tarzda sotishga uringan shaxs ham qo‘lga olindi. Bundan tashqari, Andijon viloyatining Bulakbashi tumanida ilgari sudlangan erkak shaxs noqonuniy dori savdosi bilan shug‘ullanayotgani aniqlandi.
U Andijon shahrida o‘zining “Damas” avtomobilida 124 dona kuchli ta’sir qiluvchi “Regapen” dori vositasini noqonuniy sotish maqsadida tashiyotgan vaqtida ushlangan. Mazkur holatlar bo‘yicha jinoiy ishlar qo‘zg‘atilib, hozirda tergov harakatlari olib borilmoqda.
Ushbu tadbirlar kuchli ta’sir qiluvchi dori vositalarining noqonuniy tarqalishini oldini olishga qaratilgan. Huquqni muhofaza qiluvchi organlar dori vositalarining qonuniy savdosi va nazoratini ta’minlashga alohida e’tibor bermoqda.
