O‘zbekiston Respublikasi Prezidenti Shavkat Mirziyoyev raisligida yo‘l harakati xavfsizligini oshirish, yo‘l infratuzilmasini yaxshilash hamda yo‘llardagi tirbandliklarni kamaytirish bo‘yicha videoselektor yig‘ilishi boshlandi. Bu haqida Upl.uz xabar berdi.
Yig‘ilishda ta’kidlanganidek, O‘zbekistonda yo‘l-transport hodisalari oqibatida yuzaga kelgan zarar yalpi ichki mahsulotning 0,4 foizini tashkil etadi. Yo‘llardagi vaziyat hanuz jiddiy tashvishga sabab bo‘lmoqda.
O‘tgan yilda mamlakatda 9364 ta yo‘l-transport hodisasi ro‘y berdi. Ushbu baxtsiz hodisalar natijasida taxminan 9 ming kishi jarohat oldi, 2203 nafar odam hayotdan ko‘z yumdi.
Eng ko‘p o‘lim holatlari Samarqand, Toshkent va Farg‘ona viloyatlarida qayd etildi. Ushbu masalalarni hal etish uchun kompleks choralar ko‘rilishi zarurligi alohida ta’kidlandi.
