Andijon viloyati IIB matbuot xizmati tomonidan ma’lum qilinishicha, 12 nafar huquqbuzarga nisbatan choralar ko‘rilgan. Bu haqida Upl.uz xabar berdi.
Joriy yilning 7 iyul kuni ijtimoiy tarmoqlarda 1991 yilda tug‘ilgan fuqaro va uning 11 tanishi tomonidan yo‘llarda turli avariyaviy vaziyatlar yaratgan videorolik tarqaldi. Ushbu shaxslar jamiyatda odob-axloq qoidalarini buzib, kichik bezorilik harakatlarini amalga oshirgan.
Ularning maqsadi “Damas” avtomobillari haydovchilari haqida hazilomuz mazmunda video tayyorlash bo‘lgan, unda ular bir guruh bo‘lib odamni urib yuborishi mumkinligi ko‘rsatilgan. Mazkur holat bo‘yicha har bir haydovchiga O‘zbekiston Respublikasi Ma’muriy javobgarlik kodeksining “Transport vositalari haydovchilari tomonidan to‘siq yoki avariyaviy vaziyat yaratish, yo‘lning qarama-qarshi harakatga mo‘ljallangan qismiga chiqish” moddasi bo‘yicha ma’muriy protokol tuzildi.
Har biriga 3 750 000 so‘m miqdorida jarima solinadi. Shuningdek, Andijon shahar jinoyat sudi tomonidan ushbu ish “Kichik bezorilik” moddasi bo‘yicha ko‘rib chiqilib, har bir huquqbuzarga 7 kun ma’muriy qamoq jazosi tayinlandi.
Barcha huquqbuzarlarga tegishli avtomobillar jarima maydonchasiga joylashtirildi.
👍 0❤️ 0😂 0😢 0😡 0
