Bosh prokuratura huzuridagi Departament matbuot xizmati tomonidan noqonuniy tamaki mahsulotlari aylanishining oldi olindi, deb xabar berildi. Bu haqida Upl.uz xabar berdi.
Toshkent viloyati boshqaruvi xodimlari tomonidan maxsus tezkor tadbir o‘tkazildi. Tadbir davomida Toshkent tumani “Okibat” mahalla fuqarolar yig‘ini hududida 43 million so‘mga 3 ming qadoq kontrabanda sigaret sotishga uringan shaxs qo‘lga olindi.
Shuningdek, ushbu shaxsdan 4005 qadoq xorijiy tamaki mahsulotlari dalil sifatida musodara qilindi. Aniqlanishicha, musodara qilingan barcha tamaki mahsulotlari O‘zbekiston hududiga noqonuniy olib kirilgan.
Ushbu holat yuzasidan O‘zbekiston Respublikasi Jinoyat kodeksining “Etanol spirtini, alkogol va tamaki mahsulotlarini noqonuniy aylanishi yoki ishlab chiqarilishi” moddasi bo‘yicha jinoyat ishi qo‘zg‘atildi.
