O‘zbekistonda oliy ta’lim muassasalariga kirish imtihonlari boshlandi. Bu haqida Upl.uz xabar berdi.
Ushbu imtihonlar minglab abituriyentlarning kelajagini belgilaydi. Imtihonlar 10 kun davomida ikki smenada o‘tkaziladi.
Ota-onalar va jamoatchilik test jarayonlarini test2025.uz sayti orqali onlayn kuzatishi mumkin. Abituriyentlar shuningdek, shaxsiy kabinetlari orqali imtihon vaqti, manzili haqida ma’lumot olib, imtihonga kirish ruxsatnomasini olishlari mumkin.
Bugun, 14 iyul kuni, ertalab soat 06:30 dan 08:00 gacha minglab abituriyentlar maxsus tayyorlangan auditoriyalarga kelishdi. Imtihon jarayonining halolligi va oshkoraligini ta’minlash maqsadida qat’iy tekshiruvdan so‘ng har bir ishtirokchi o‘z o‘rnini egalladi.
Soat 08:00 da oldindan belgilangan fanlar bo‘yicha test topshiriqlari boshlandi. Savollar maxfiy qog‘ozlarda chop etilgan bo‘lib, imtihon boshlanishidan avval abituriyentlar ishtirokida ochildi.
Imtihonlar 65 ta katta sig‘imli yopiq binolarda o‘tkazilmoqda. Butun jarayon videokuzatuv kameralar va mustaqil kuzatuvchilar nazorati ostida bo‘ladi.
Har bir smenada 35 070 nafar abituriyent 1 169 guruhga taqsimlangan holda ishtirok etadi. Bir kunda jami 70 140 nafar abituriyent imtihon topshiradi.
Ma’lumot uchun, joriy yilda 671 397 nafar abituriyent ro‘yxatdan o‘tgan. Ulardan 426 685 nafari yoki 63,6 foizi ayni yil bitiruvchilari hisoblanadi.
Ro‘yxatga olinganlarning 361 019 nafari qizlar (53,8%), 310 378 nafari o‘g‘il bolalar (46,2%)dir. Eng ko‘p ishtirokchilar quyidagi hududlarda ro‘yxatdan o‘tgan: Toshkent shahri — 115 989 nafar, Samarqand viloyati — 72 305, Farg‘ona viloyati — 66 383, Qashqadaryo viloyati — 62 484, Andijon viloyati — 56 025 nafar.
Imtihonlar 23 iyulgacha davom etadi.
