Uzenergoinspektsiya matbuot xizmati xabariga ko‘ra, Surxondaryo viloyati boshqarmasi xodimlari tomonidan Angor tumani hududida joylashgan xususiy "A.A.K" avtomobil yoqilg‘i quyish shoxobchasining faoliyati tekshirildi. Bu haqida Upl.uz xabar berdi.
Tekshiruv jarayonida mutaxassislar tomonidan AI-92 markali benzin va dizel yoqilg‘isidan namunalar olinib, laboratoriya tahliliga yuborildi. Laboratoriya natijalari yoqilg‘i sifatining davlat standartlariga mos kelmasligini aniqladi.
Shunga ko‘ra, ushbu avtomobil yoqilg‘i quyish shoxobchasiga moliyaviy jarima qo‘llanildi. Jarima summasi jami 16,4 million so‘mni tashkil etdi.
Bundan tashqari, korxona rahbariyatiga sifatli bo‘lmagan neft mahsulotlarini sotishni taqiqlash va yoqilg‘i sifatini tiklash bo‘yicha ko‘rsatma berildi. Ushbu choralar yoqilg‘i bozori sifatini oshirish va iste’molchilar manfaatlarini himoya qilish maqsadida amalga oshirildi.
