Numbeo tahliliy portali tomonidan e’lon qilingan so‘nggi ma’lumotlarga ko‘ra, 2025 yilda O‘zbekiston dunyoning eng xavfsiz mamlakatlari reytingida 25-o‘rinni egalladi. Bu haqida Upl.uz xabar berdi.
Numbeo xavfsizlik indeksi (Safety Index) va jinoyatchilik indeksi (Crime Index)ni foydalanuvchilar so‘rovlari asosida shakllantiradi. So‘rov ishtirokchilari jinoyatchilik darajasi, kunning turli vaqtlarida xavfsizlik holati, o‘g‘irlik, hujum va bezovtalik kabi turli jinoyatlarga uchrash xavfi hamda mol-mulk va shaxsga qarshi jinoyatlarning og‘irligini baholaydilar.
Xavfsizlik indeksi 0 dan 100 gacha bo‘lib, indeks qanchalik yuqori bo‘lsa, mamlakat shunchalik xavfsiz hisoblanadi. O‘zbekistonning xavfsizlik indeksi 73,4 ni tashkil etib, bu ko‘rsatkich yuqori darajada ekanligini bildiradi.
Jinoyatchilik indeksi esa 26,6 ga teng bo‘lib, u past darajani anglatadi. Markaziy Osiyo davlatlari orasida Qozog‘iston 73-o‘rinda bo‘lib, uning xavfsizlik indeksi 54,4 ni tashkil etadi.
Qirg‘iziston esa 101-o‘rinda joylashgan va uning indeksi 48 ga teng. Dunyoning eng xavfsiz mamlakatlari reytingida Birlashgan Arab Amirliklari birinchi o‘rinni egallagan.
Ularning ortidan Andorra ikkinchi, Qatar esa uchinchi o‘rinda turadi. Eng xavfli mamlakatlar sifatida Gaiti, Papua Yangi Gvineya va Venesuela tan olingan.
Ta’kidlash joizki, ushbu ma’lumotlar rasmiy davlat statistikasi emas, balki so‘rov qatnashchilarining shaxsiy fikr va tajribalariga asoslangan. Shuning uchun bu reyting sub’ektiv baho ekanligini hisobga olish zarur.
