Buxoroda birinchi marta brutto shartnoma asosida ishlaydigan avtobus yo‘nalishlari ishga tushirildi. Bu haqida Upl.uz xabar berdi.
Ushbu yo‘nalish tarixiy Chor-Bakr nekropoli bilan xalqaro aeroportni bog‘laydi. Bu haqda O‘zbekiston Respublikasi Transport vazirligi matbuot xizmati ma’lum qildi.
Yangi avtobuslar har 9-10 daqiqada qatnov olib boradi, bu esa harakatning yuqori chastotasini ta’minlaydi. Yo‘nalish shahar markazidagi muhim nuqtalarni qamrab olgan holda ishlab chiqilgan.
U Ibrohim ibn Sino ko‘chasidan o‘tib, markaziy bozor hududini qamrab oladi, so‘ngra Dilqushko ko‘chasidan davom etadi. Bu esa sayyohlik ob’ektlari, savdo markazlari va transport tugunlari o‘rtasida qulay aloqani ta’minlaydi.
Brutto shartnoma shahar hokimiyati bilan transport operatori o‘rtasidagi ilg‘or hamkorlik modelidir. An’anaviy tizimdan farqli o‘laroq, bu modelda yo‘lovchi chiptalaridan tushgan daromad to‘g‘ridan-to‘g‘ri transport operatoriga emas, balki shahar byudjetining maxsus hisobiga o‘tadi.
Shahar hokimiyati esa qatnovlar hajmi va sifatiga qarab transport operatorining xizmatlari uchun to‘lov amalga oshiradi. Bu tizim transport xizmatlarining sifatini oshirishga va shahar aholisiga qulaylik yaratishga xizmat qiladi.
