Farg‘ona viloyati Ichki ishlar boshqarmasi matbuot xizmati tomonidan ta’kidlanishicha, taqiqlangan o‘simliklarni yetishtirish holati aniqlandi. Bu haqida Upl.uz xabar berdi.
"Xavfsiz va sog‘lom mamlakat" profilaktika tadbirlari doirasida Farg‘ona viloyatining O‘zbekiston tumanida maxsus tezkor tadbir o‘tkazildi. Tadbir davomida "Shodlik" mahallasida yashovchi 1980 yilda tug‘ilgan fuqaroning uyi va hovlisi ko‘zdan kechirildi.
Tekshiruv vaqtida guvohlar ishtirokida uning uy hovlisida narkotik xususiyatga ega bo‘lgan "kannabis" o‘simligini yetishtirayotgani aniqlandi. Jami 12 dona kannabis butalari topilib, dalil sifatida rasmiylashtirildi.
Ushbu holat bo‘yicha O‘zbekiston Respublikasi Jinoyat kodeksining "Taqiqlangan o‘simlik turlarini yetishtirish" moddasi bo‘yicha jinoiy ish qo‘zg‘atildi. Bu tadbir jinoyatlarning oldini olish va profilaktikasiga qaratilgan choralarning samaradorligini oshirishga xizmat qiladi.
