2026 yildan boshlab Apple TV AQShda barcha “Formula-1” poygalarini eksklyuziv tarzda efirga uzatadi. Bu haqda Zamin.uz xabar berdi.
Bu haqda Variety nashri ma’lumot berdi. Apple va “Formula-1” rahbariyati o‘rtasida besh yillik striming hamkorligi bo‘yicha kelishuv imzolangan bo‘lib, uning umumiy qiymati 750 million dollarni tashkil etadi.
Ushbu shartnoma doirasida Apple TV obunachilari barcha mashg‘ulotlar, saralash bosqichlari, sprint poygalari hamda Gran-prilarni ingliz va ispan tillarida jonli efirda tomosha qilish imkoniga ega bo‘ladi. Bundan tashqari, mavsum davomida ayrim poygalar va mashg‘ulotlar Apple TV ilovasida barcha foydalanuvchilar uchun bepul taqdim etiladi.
Apple kompaniyasi vakillari ta’kidlaganidek, ushbu hamkorlik “Formula-1” translyatsiyalarini yanada jonli, zamonaviy va qiziqarli tarzda namoyish etishga xizmat qiladi. Ikkala tomon ham kelishuv AQShda avtosport muxlislarining yangi avlodini shakllantirishga yordam beradi, deb hisoblaydi.
Hozircha moliyaviy tafsilotlar rasmiy ravishda e’lon qilinmagan, ammo Variety manbasiga ko‘ra, Apple yiliga o‘rtacha 150 million dollar to‘laydi. Shuningdek, kompaniyalar ilgari ham muvaffaqiyatli hamkorlik qilgan, jumladan Bred Pitt ishtirokidagi “Formula-1” filmi aynan shu hamkorlik natijasida yaratilgan va aktyorning eng daromadli filmlaridan biriga aylangan.
Filmning umumiy daromadi 600 million dollardan oshgan.
